18. 12. 2020: Елена ХОМОВА-ГРІНЁВА: Велія, Світло Рождества, Подьме колядовати (Стишкы) 

Елена ХОМОВА-ГРІНЁВА

Велія

Бомбулькы ся блищать
на стромику в домі,
Ісуско тихенько
лежить на соломі.

Радостно дзвоны дзвонять,
несуть нам новину,
Рождества годину
кличуть на Велію.

Народжене дїтя,
повите пленами,
то наймилшый гость
перебывать ту з нами.

Вєдно заспівайме
колядкы малому,
пустьме го до сердець,
поклоньме ся ёму. 

Світло Рождества

Запальме світло на яличцї,
бо Рождества пришов час,
рік што рік СЫН НАРОДЖЕНЫЙ
приходить на землю меджі нас.

Боже дїтя в яслях лежыть,
в холодї, бідї, в самотї,
мати Марія ёго колыше,
старенькый Осиф стереже.

Приймийме малого ІСУСКА,
няй войде до нашых сердець,
няй благодарить вашы душы
в каждый день, нелем днесь.

Подьме колядовати

Колядуйме, сестры, братя,
як даколи нашы дїды,
няй народженый Ісуско
охранить нас од хвороты, біды.

До каждого дому вкрочме
з віфлеємскыма колядами,
принесьме там покій, щастя,
вєдно з рождественныма вінчованями.

Няй народженый Ісуско
благословить нам родины,
бы до далшого Рождества
мали достаток здравя, силы.